KFUM-skótarnir í Føroyum er ein samskipan av øllum KFUM-skótabólkum í Føroyum.

KFUM-skótarnir í Føroyum vórðu stovnaðir 6. august 1939. Stovnarin og fyrsti leiðarin var Palli Thomsen í Gøtu. Fram til 1972 vóru vit ein deild (division) av KFUM-skótunum í Danmark. Í dag eru vit ein sjálvstøðug samskipan. Vit rokna tó tann 6. august 1939 sum stovningardag hjá samskipanini.

Fyrstu nógvu árini vóru einans dreingir limir hjá KFUM-skótunum, men síðan 1980 hava bæði dreingir og gentur verði limir hjá FKUM-skótunum.

Alt arbeiðið hjá KFUM-skótunum byggir á grundlógina og viðtøkurnar hjá samskipanini, sum eru samtyktar á landsfundi, ið er okkara hægsti mynduleiki.
Mest tíðandi greinirnar í grundlógini eru tær, sum viðgerða endamál og arbeiðsgrundreglurnar hjá samskipanini.

Endamál
Samskipanin er eitt kirkjuligt arbeiði við tí endamáli at lata børn og ung møta gleðiboðskapinum og við sínum lyndisskapandi frítíðarvirksemi at uppala til dugandi samfelagsborgarar, at vera sjálvstøðug og demokratisk, at kenna ábyrgd og at virða onnur fólkasløg.

Arbeiðsgrundreglur
Endamálið hjá samskipanini eigur at vera grundað á grundreglur Baden-Powells, sum byggja á patrúljuskipanina. Hetta verður framt gjøgnum skiftandi arbeiðshættir við trúboðan, kristnifrálæru, skótaítrótti, útilívi og øðrum mennandi virksemi, har skift verður millum samarbeiði við onnur og við sjálvstøðugt virksemi hjá tí einstaka.